એક ઇસમ મુદ્દામાલ સાથે ઝડપાયો જ્યારે અન્ય ચાર ઓળખાયેલા અને દસ જેટલા વણઓળખાયેલા ઇસમો વિરુધ્ધ ગુનો નોંધાયો
ભરૂચ જિલ્લાના ઝઘડીયા ખાતેની જીઆઇડીસી માં એક બંધ પડેલ કંપનીમાંથી લોખંડની એંગલો તેમજ લોખંડની જાળીઓની ચોરી કરતી ટોળકી પૈકી એક ઇસમ મુદ્દામાલ સાથે ઝડપાયો હતો, જ્યારે અન્ય ચાર જેટલા ઓળખાયેલા અને ૧૦ જેટલા વણઓળખાયેલા ઇસમોને ઝડપી લેવા પોલીસે કવાયત હાથ ધરી છે. ઝઘડીયા પોલીસમાંથી પ્રાપ્ત વિગતો મુજબ ઝઘડીયા પીઆઇ પી.એચ.વસાવા પોલીસ ટીમ સાથે ઝઘડીયા જીઆઇડીસી વિસ્તારમાં પેટ્રોલિંગમાં હતા ત્યારે તે દરમિયાન બાતમી મળી હતીકે જીઆઇડીસી માં બંધ પડેલ આકાશ ટાઇલ્સ નામની કંપનીમાંથી કેટલાક ઇસમો લોખંડની એંગલોની ચોરી કરે છે. પોલીસે બાતમી મુજબના સ્થળે છાપો મારતા એક ઇસમ સ્થળ ઉપર પકડાઈ ગયો હતો, અને કેટલાક ઇસમો ભાગી છુટ્યા હતા. પકડાયેલ ઇસમ પાસે પોલીસે આ સ્થળેથી લોખંડ લઇ જવા માટેના જરૂરી કાગળો માંગતા આ ઇસમ કોઇ વ્યવસ્થિત જવાબ આપી શકેલ નહી. પોલીસે ઘટના સ્થળેથી લોખંડની એંગલો તેમજ જાળીઓ મળી કુલ રુ.૧૯૧૨૫ નો મુદ્દામાલ કબજે લીધો હતો. પોલીસ તપાસ દરમિયાન આ પકડાયેલ ઇસમનું નામ વિજયભાઇ મુન્નાભાઇ વસાવા રહે.ગામ લિંભેટ તા. ઝઘડીયાના હોવાની જાણ થઇ હતી. તેમજ આ પકડાયેલ ઇસમને ભાગી ગયેલ ઇસમોના નામ પુછતા તેમના નામ અક્ષયભાઇ રવિયાભાઇ વસાવા રહે.ગામ લિંભેટ તેમજ કનૈયાભાઇ અમરસિંગ વસાવા અને સતિષભાઇ મોહનભાઈ વસાવા બન્ને રહે.તલોદરા તા.ઝઘડીયાના હોવાની જાણ થઇ હતી. ઉપરાંત આ કામમાં બીજા અન્ય દસેક જેટલા ઇસમો પણ સામેલ હોવાનું જણાયુ હતું. પકડાયેલ ઇસમને આ અન્ય ઇસમોના નામ ખબર નહી હોવાનું તેણે જણાવ્યું હતું. આ મુદ્દામાલ નફીશ ભંગારવાળાને આપવાનો હોવાની જાણ થઇ હતી. ઝઘડીયા પોલીસે આ મુદ્દામાલ કબજે લઇને એક પકડાયેલ ઇસમ તેમજ નહિ પકડાયેલ અન્ય ચાર ઓળખાયેલ ઇસમો ઉપરાંત દસેક જેટલા વણઓળખાયેલ ઇસમો વિરુધ્ધ ગુનો નોંધી કાયદેસર કાર્યવાહી હાથ ધરી હતી
વિડિયો જર્નાલિસ્ટ પ્રકાશ ચૌહાણ સાથે સત્યા ટીવી ઝઘડિયા