રાજકોટ પોલીસ મથકમાં નયનાબેન નામની મહિલાએ આપઘાત કરી લેતા સનસનાટી મચી જવા પામી હતી. મહિલાના આત્મઘાતી પગલાં પાછળના કારણ અંગે ઝોન-1ના DCP પ્રવિણકુમાર મીણાએ મીડિયા સમક્ષ ખુલાશો કરી જણાવ્યુ હતું કે પ્રેમસબંધ હોવાની શંકાએ મહિલાને પૂછપરછ માટે બોલાવવામાં આવી હતી જ્યાં મહિલાએ રાત્રે ઘરે ન જવાનું કહી પોલીસ મથકમાં જ આપઘાત કરી લિધો હતો. જેને પગલે પોલીસ દ્વારા મૃતદેહને પીએમ અર્થે હોસ્પિટલ ખાતે ખસેડવા સહિતની કાર્યવાહી હાથ ધરી છે.
આજીડેમ પોલીસ સ્ટેશનમાં બાથરુમાં યુવતીએ ગળેફાંસો ખાઈ આપઘાત કરી લીધો હતો. આ અંગે DCP ઝોન 1 પ્રવીણ કુમાર મીણાએ ખુલાશો કરતાં જણાવ્યું હતું કે રાજકોટના મુકેશ નામના વ્યક્તિએ પોતાને રવિ નામના યુવાને માર માર્યો હોવાની ફરિયાદ નોંધાવી હતી. આ ફરિયાદની પૂછપરછ દરમિયાન મુકેશ વધુ માહિતી આપતો ન હતો. જેમાં મુકેશે નયનાબેન અને રવિ બંને વચ્ચે સંબંધ હોવાની પોલીસને માહિતી આપી હતી. રવિ સાથે સંબંધ હોવાથી આપઘાત કરનાર મહિલાને પૂછપરછ અર્થે પોલીસ સ્ટેશન ખાતે બોલાવવામાં આવી હતી. પૂછપરછ બાદ મહિલાએ પોતાના ઘરે જવાની મનાઈ કરી હતી. મહિલાને પતિ સાથે ઝઘડો થવાનો ભય હોવાથી ઘરે જવાની ના પાડી હતી અને મહિલાએ પોલીસ સ્ટેશનમાં આશરો આપવાની કાકલૂદી કરતાં પોલીસે તેને પોલીસ મથકમાં જ આશરો આપ્યો હતો.
