પાકિસ્તાનમાં લાહોર અને પંજાબ સહિત કેટલાક પ્રાંતોમાં પૂરે તબાહી મચાવી છે લોકોને ખાવાના ફાંફા પડી રહ્યા છે. પૂરના કારણે વિભિન્ન શાકભાજી અને ફળોની કિંમતોમાં ભીષણ ઉછાળો જોવા મળી રહ્યો છે. આ દરમિયાન પાકિસ્તાન સરકાર ભારત પાસેથી ટામેટા અને ડુંગળીની આયાત કરી શકે છે. બજારના હોલસેલ વેપારીઓએ આ માહિતી આપી છે.
પાકિસ્તાન સ્થિત લાહોરના એક હોલસેલ વેપારીએ જણાવ્યું હતું કે, રવિવારે લાહોરના બજારોમાં ટામેટા અને ડુંગળીની કિંમત ક્રમશ: 500 રૂપિયા અને 400 રૂપિયા કિલો રહી હતી. જોકે, રવિવારના બજારોમાં, ટામેટાં અને ડુંગળી સહિત અન્ય શાકભાજી નિયમિત બજારો કરતાં 100 રૂપિયા પ્રતિ કિલો ઓછા ભાવે ઉપલબ્ધ હતા.
આગામી દિવસોમાં ખાદ્યપદાર્થોના ભાવમાં વધુ વધારો થશે કારણ કે પૂરને કારણે બલૂચિસ્તાન, સિંધ અને દક્ષિણ પંજાબમાંથી શાકભાજીના પુરવઠાને ભારે અસર થઈ છે. તેમણે કહ્યું કે, ડુંગળી અને ટામેટાના ભાવ આગામી દિવસોમાં 700 રૂપિયા પ્રતિ કિલોને પાર કરી શકે છે. તેવી જ રીતે બટાકાની કિંમત 40 રૂપિયા પ્રતિ કિલોથી વધીને 120 રૂપિયા થઈ ગઈ છે.
