‘કૌન બનેગા કરોડપતિ 14’માં બીજો સ્પર્ધક કરોડપતિ બન્યો છે. દિલ્હીનો શાશ્વત ગોયલ હોટસીટ પર આવ્યો હતો અને તેણે એક કરોડ રૂપિયા જીત્યા હતા. ગયા મહિને કવિતા ચાવલા એક કરોડ રૂપિયા જીતી હતી.
ફાસ્ટેસ્ટ ફિંગર્સ ફસ્ટમાં શાશ્વત ગોયલનું નામ ટોપ પર આવે છે. બિગ બી તેને હોટસીટ પર આવવા માટે બોલાવે છે. તે આવે છે અને અમિતાભ તેનું ઇન્ટ્રોડક્શન આપે છે. આ સાથે જ અમિતાભે કહ્યું હતું કે તે પોતાના કમ્પેનિયન તરીકે કોઈને લાવ્યો નથી અને એકલો જ આવ્યો છે.
શાશ્વતે કહ્યું હતું, ‘જ્યારે પહેલી જ વાર વર્ષ 2000માં આ શો ટીવી પર આવ્યો ત્યારે હું પરિવાર સાથે રાત્રે નવ વાગે આ શો જોતો હતો. તે સમયે મારી માતા કહેતી કે તેમનું સપનું છે કે દીકરો એક દિવસ હોટસીટ પર બેસે, પરંતુ કોરોનાની બીજી લહેરમાં મારી માતાનું અવસાન થયું હતું. ત્યારથી લઈને આજ સુધી મારા જીવનમાં અનેક મુશ્કેલીઓ આવી છે.’
વધુમાં શાશ્વતે કહ્યું હતું, ‘હોટસીટ સુધી પહોંચવા હું છેલ્લાં નવ વર્ષથી પ્રયાસ કરતો હતો. જોકે, હું જેના માટે આ પ્રયાસ કરતો હતો તે જ આજે દુનિયામાં નથી.’ ત્યારબાદ શાશ્વત રડવા લાગે છે. તે સ્પર્ધક સાથે આવેલા કમ્પેનિયન જ્યાં બેસે છે, ત્યાં જાય છે અને રડે છે. તેણે કહ્યું હતું, ‘તમારા માટે, અહીંયાની ઓડિયન્સ માટે, ઘરે બેઠેલાં દર્શકો માટે આ સીટ ખાલી છે, પરંતુ મારા માટે આ સીટ પર જેને હોવું જોઈએ તે આજે પણ હાજર છે.’
શાશ્વત એક કરોડની ઈનામી રકમ જીતી જાય છે અને તે 7.5 કરોડના સવાલનો જવાબ પણ આપે છે. શાશ્વત છેલ્લા સવાલનો જવાબ સાચો આપે છે કે નહીં તે તો શો જોયા બાદ જ ખબર પડશે. જો શાશ્વત સાડા સાત કરોડનો જવાબ નહીં આપી શકે તો તે 75 લાખ રૂપિયા જીતશે. જો શાશ્વત સાચો જવાબ આપશે તો ‘કેબીસી’ના ઈતિહાસમાં આ પહેલી વાર બનશે કે કોઈ સ્પર્ધક 7.5 કરોડ રૂપિયા જીતશે.
શાશ્વત ગોયલ દિલ્હીનો છે અને ઇ કોમર્સ કંપનીમાં સ્ટ્રેટેજી મેનેજર છે. આ એપિસોડ 10 ઓક્ટોબરના રોજ ટેલિકાસ્ટ કરવામાં આવશે.
