ઘટના બાદ પોલીસ ઘટનાસ્થળે પહોંચી હતી અને સ્થળ પર શાંતિ જાળવીને બંને પક્ષના લોકોને પોલીસ સ્ટેશન બોલાવ્યા હતા અને તેમના નિવેદનો નોંધ્યા હતા
ગાઝિયાબાદ શહેરને અડીને આવેલા ઈકલા ગામમાં મંગળવારે મોડી સાંજે બે સમુદાયના લોકો વચ્ચે ઉગ્ર લડાઈ, પથ્થરમારો અને ગોળીબાર થયો હતો. આ ઘટનામાં બંને પક્ષના ડઝનેક લોકો ઘાયલ થયા હતા. કહેવામાં આવી રહ્યું છે કે રોડ પર પાર્ક કરેલી કારને લઈને બંને પક્ષો વચ્ચે વિવાદ શરૂ થયો હતો. માહિતી મળતા જ ઘટનાસ્થળે પહોંચેલી ગાઝિયાબાદ પોલીસે બંને પક્ષોને શાંત પાડ્યા હતા. અત્યાર સુધી આ કેસમાં એક પક્ષે પોલીસમાં ફરિયાદ આપી છે જ્યારે બીજી બાજુએ આજે ફરિયાદ આપવાની વાત કરી છે. પોલીસ આ મામલે તપાસ કરી રહી છે.
પોલીસે જણાવ્યું કે, મામલો મસૂરી પોલીસ સ્ટેશન વિસ્તારના ઈકલા ગામનો છે. મંગળવારની મોડી સાંજે આ ગામમાં રહેતો મોહિત રોડ પર કાર પાર્ક કરીને કોઈની સાથે વાત કરતો હતો. ત્યારે આ સમયે આ ગામનો રહેવાસી મોહસીન તેની કાર લઈને પાછળથી આવ્યો હતો. તેણે મોહિતને આગળ જવા માટે કાર હટાવવા કહ્યું પરંતુ આ બાબતે બંને વચ્ચે ઝઘડો થઈ ગયો હતો ત્યારબાદ બંનેએ પોતપોતાના પક્ષના લોકોને બોલાવ્યા. આરોપ છે કે, બંને પક્ષોના આવવાની સાથે જ ઉગ્ર બોલાચાલી અને પથ્થરમારો થયો હતો. આ દરમિયાન એક તરફથી ફાયરિંગનો પણ આરોપ છે. જોકે, ન તો કોઈને ગોળી વાગી છે અને ન તો પોલીસે ગોળીબારની પુષ્ટિ કરી છે.
ઘટના બાદ પોલીસ ઘટનાસ્થળે પહોંચી હતી અને સ્થળ પર શાંતિ જાળવીને બંને પક્ષના લોકોને પોલીસ સ્ટેશન બોલાવ્યા હતા અને તેમના નિવેદનો નોંધ્યા હતા. આ દરમિયાન એક તરફના લોકોએ ત્રણ ઘાયલોને રજૂ કરીને પોલીસને ફરિયાદ કરી છે. સામે પક્ષે લડાઈ શરૂ થઈ હોવાનો આરોપ કર્યો હતો. બીજી તરફ બીજા પક્ષે હજી સુધી કોઈ ફરિયાદ નથી આપી પરંતુ પોલીસને જણાવ્યું કે, તેમના પક્ષના ઘણા લોકો ઘાયલ થયા છે. જેમને હોસ્પિટલમાં દાખલ કરવામાં આવ્યા હતા.
બે સમુદાયો વચ્ચેના વિવાદને કારણે પોલીસે સાવચેતીના ભાગરૂપે ગામમાં મોટી સંખ્યામાં પોલીસ બંદોબસ્ત ગોઠવી દીધો છે. ગ્રામ્યના પોલીસ અધિક્ષક ઈરાજ રાજાએ જણાવ્યું હતું કે, હાલમાં ગામમાં શાંતિ જળવાયી છે. બંને પક્ષોની ફરિયાદના આધારે કેસ નોંધવામાં આવી રહ્યો છે. તેમણે કહ્યું કે, ગાડીને રસ્તો આપવાના નામે અથડામણ થઈ હતી.