મુલદ ગામેથી વિદેશી દારુનો જથ્થો ઝડપાયો
વિદેશી દારુના જથ્થા સાથે એક ઇસમ પકડાયો
કુલ રુ.૨૬૧૦૦ની કિંમતનો દારૂનો જથ્થો મળી આવ્યો
2 ઇસમો વિરુધ્ધ ગુનો નોંધી કાર્યવાહી હાથ ધરી
ભરૂચ જિલ્લાના ઝઘડિયા તાલુકાના મુલદ ગામેથી પોલીસે ભારતીય બનાવટના વિદેશી દારૂના જથ્થા સાથે એક ઇસમને ઝડપી લીધો હતો,જ્યારે આ દારૂનો જથ્થો જેની પાસેથી આવ્યો હતો, તે ઇસમને વોન્ટેડ જાહેર કરી તેને ઝડપી લેવા કવાયત હાથ ધરી હતી.
ઝઘડિયા પોલીસમાંથી મળતી વિગતો મુજબ ઝઘડિયા પોલીસને પોલીસ સ્ટેશન વિસ્તારમાં પેટ્રોલિંગ દરમિયાન બાતમી મળી હતી કે મુલદ ગામે રહેતો નરેશ ઉર્ફે લંગડો શાંતિલાલ વસાવા તેના ઘરે ઇંગ્લીશ દારૂનું વેચાણ કરે છે. પોલીસે મળેલ બાતમી મુજબના સ્થળે જઇને છાપો મારતા સદર ઇસમના ઘરમાં ટેબલની નીચે ગોદડામાં સંતાડેલ ભારતીય બનાવટના વિદેશી દારૂની અલગઅલગ બ્રાન્ડની નાનીમોટી કુલ ૧૪૦ બોટલો તેમજ બિયર ટીન નંગ ૪૦ મળી કુલ રુ.૨૬૧૦૦ ની કિંમતનો દારૂનો જથ્થો મળી આવ્યો હતો. પોલીસે ઘટના સ્થળેથી મળી આવેલ વિદેશી દારૂના જથ્થા સાથે નરેશ ઉર્ફે લંગડો વસાવા રહે.ગામ મુલદ તા.ઝઘડિયાનાને અટકમાં લઇને દારૂનો આ જથ્થો જે ઇસમ પાસેથી લાવવામાં આવ્યો હતો, તે અનિલ વસાવા રહે.ગામ વાડી તા.ઉમરપાડા જિ.સુરતનાને વોન્ટેડ જાહેર કરીને આ બન્ને ઇસમો વિરુધ્ધ ગુનો નોંધી કાયદેસર કાર્યવાહી હાથ ધરી હતી.
વિડીયો જર્નાલિસ્ટ પ્રકાશ ચૌહાણ સાથે સત્યા ટીવી ઝઘડિયા