તમિલનાડુના એક જિલ્લાની શાળામાં હિન્દુ માતા-પિતાએ બાળકોને સરકારી યોજના હેઠળ આપવામાં આવતો સવારનો નાસ્તો ન ખાવા માટે દબાણ કર્યું છે. જાતિવાદના મામલા અટકવાનું નામ નથી લઈ રહ્યા ત્યારે હવે તમિલનાડુના થૂથુકુડીમાં એક એવો જ જાતિવાદનો મામલો સામે આવ્યો છે. માતા-પિતાએ તેની પાછળનું કારણ આપ્યું છે કે સીએમ બ્રેકફાસ્ટ સ્કીમ હેઠળ આપવામાં આવતું ભોજન એક દલિત મહિલા દ્વારા તૈયાર કરવામાં આવ્યું છે. જો કે સમગ્ર મામલો સામે આવતા હોબાળો મચી ગયો છે. શાળા પ્રસાશનના સમજાવ્યા બાદ પણ વાલીઓ માનવા તૈયાર જ નથી.
રાજ્ય સરકારની યોજના હેઠળ બાળકોને નાસ્તાનું વિતરણ કરવામાં આવે છે. અહીં પીરસવામાં આવતો નાસ્તો એક દલિત મહિલા દ્વારા તૈયાર કરવામાં આવી રહ્યો છે, તેથી હિંદુ માતા-પિતાએ તેમના બાળકોને નાસ્તો ન ખાવા માટે દબાણ કરી રહ્યા હોવાનું જણાવ્યું છે. આ સમગ્ર મામલે રાજ્યના સમાજ કલ્યાણ અને મહિલા સશક્તિકરણ મંત્રી પી ગીતા જીવન, મહેસૂલ અધિકારી અને તહસીલદારે સમગ્ર મામલામાં હસ્તક્ષેપ કર્યો છે.
મોટાભાગના બાળકોએ જિલ્લાની યુસીલમપટ્ટીની યુનિયન પ્રાથમિક શાળામાં આપવામાં આવેલો નાસ્તો ખાધો ન હતો. બાળકોના વાલીઓએ જણાવ્યું કે તેમના બાળકો શાળાએ જતી વખતે ઘરેથી નાસ્તો કરે છે, તેથી તેઓ શાળામાં આપવામાં આવતો નાસ્તો ખાતા નથી. પાછળથી તે પ્રકાશમાં આવ્યું કે મોટાભાગના પછાત વર્ગ અને અત્યંત પછાત વર્ગના લોકોએ તેમના બાળકોને નાસ્તો ન કરવા કહ્યું છે. સોમવારે આવા તમામ હિંદુ વાલીઓ સાથે અધિકારીઓની બેઠક યોજાઈ હતી જે અનિર્ણિત રહી હતી. માતાપિતા તેમના નિર્ણય પર અડગ રહ્યા.
