બાબા કેદારનાથના દ્વાર 6 મહિના બાદ ખુલ્યા છે. શુભ મુહૂર્ત મુજબ સવારે 6.25 કલાકે વૈદિક મંત્રોચ્ચાર સાથે મંદિરના દરવાજા ખોલવામાં આવ્યા હતા, ત્યારબાદ મુખ્ય પૂજારીએ બાબાની ડોલી સાથે મંદિરમાં પ્રવેશ કર્યો હતો. આ અવસરે ઉત્તરાખંડના મુખ્યમંત્રી પુષ્કર સિંહ ધામી પણ 10 હજાર શ્રદ્ધાળુઓ સાથે હાજર રહ્યા હતા.
મંદિરના પ્રાંગણને 10 ક્વિન્ટલ ફૂલોથી શણગારવામાં આવ્યું છે. આ પહેલા ગુરુવારે જ કેદારનાથમાં ભક્તોનો ધસારો જોવા મળ્યો હતો. 2020 માં કોરોના મહામારી ફેલાયા બાદ અહીં ભક્તોને દર્શન કરવા દેવામાં આવતા ન હતા. દર વર્ષે દરવાજા ખોલવામાં આવતા અને બાબાની પૂજા કરવામાં આવતી હતી.
ગુરુવારે સવારે ગૌરીકુંડથી હજારો ભક્તો કેદારનાથ ધામ તરફ પ્રયાણ કર્યું હતું. ભક્તોએ અહીંથી લગભગ 21 કિમીનું અંતર પગપાળા, ઘોડા અથવા પીટ્ઠું પર કાપ્યું હતું. સવારે 6 વાગ્યે શરૂ થયેલી યાત્રા સાંજે 4 કલાકે કેદારનાથ ધામ ખાતે પૂર્ણ થઈ હતી. ક્ષમતા કરતા વધુ ભક્તોના આગમનને કારણે અફરા-તફરીનું વાતાવરણ હતું, ત્યારબાદ હજારો શ્રદ્ધાળુઓને ગૌરીકુંડ ખાતે અટકાવવામાં આવ્યા હતા. જોકે, શુક્રવારે સવારે બધાને કેદારનાથ જવાની મંજૂરી આપવામાં આવી હતી.
બાબા સમાધિમાંથી બહાર આવ્યા,એવું માનવામાં આવે છે કે બાબા કેદારનાથ વિશ્વના કલ્યાણ માટે 6 મહિના સુધી સમાધિમાં રહે છે. મંદિરના દરવાજા બંધ કરવાના અંતિમ દિવસે અર્પણ કર્યા બાદ દોઢ ક્વિન્ટલ ભભૂતિ ચઢાવવામાં આવે છે. દરવાજા ખુલતાની સાથે જ બાબા કેદાર સમાધિમાંથી જાગી જાય છે. આ પછી તે ભક્તોને દર્શન આપે છે.