સુરત કતારગામ વિસ્તારમાં જવેલર્સની દુકાનમાં લૂંટ
જવેલર્સની આંખમાં મરચાની ભૂકી નાખી ચલાવી લૂંટ
3.77 લાખની ૫ ચેઈનની લૂંટ કરી ફરાર
સુરતના કતારગામ વિસ્તારમાં જવેલર્સની દુકાનમાં લૂંટની ઘટના બની હતી. ગ્રાહકના સ્વાંગમાં આવેલા ઇસમેં જવેલર્સની આંખમાં મરચાની ભૂકી નાખી ૩.૭૭ લાખની ૫ ચેઈનની લૂંટ કરી ફરાર થઇ ગયો હતો. જો કે આરોપીને પોલીસે ગણતરીના કલાકોમાં જ ઝડપી પાડ્યો હતો. યુ ટ્યુબ પર વિડીયો જોઈ આરોપીએ લૂંટના ગુનાને અંજામ આપ્યો હતો
સુરતના કતારગામ વિસ્તારમાં રહેતા દર્શનભાઈ પ્રવીણભાઈ શાહ કતારગામ આંબાતલાવડી રોડ પાસે સમોર ગોલ્ડ પેલેસ નામની જવેલર્સની દુકાન ધરાવે છે. ૪ ઓગસ્ટ ૨૦૨૨ ના રોજ તેઓની દુકાને એક વ્યક્તિ આવ્યો હતો અને સોનાની ચેઈન જોવા માંગી હતી. જેથી જવેલર્સે તેને ચેઈન જોવા આપી હતી. આ દરમ્યાન ગ્રાહકના સ્વાંગમાં આવેલા ઇસમેં ચેઈનની કિંમત પૂછી હતી. જેથી જવેલર્સ ચેઈનનું વજન કરી કેલ્ક્યુલેટરમાં હિસાબ કરતા હતા આ દરમ્યાન ગ્રાહકના સ્વાંગમાં આવેલા ઇસમેં તેના ખભા પર લટકાવેલા પર્સમાંથી મરચાની ભૂકી કાઢી જવેલર્સની આંખમાં નાખી હતી અને બાદમાં ત્યાંથી ૩.૭૭ લાખની કિમતની ૫ ચેઈનની લૂંટ કરી બાઈક પર બેસી ફરાર થઇ ગયો હતો. આ મામલે જવેલર્સ દર્શનભાઈ દ્વારા તાત્કાલિક પોલીસને જાણ કરવામાં આવી હતી જેથી પોલીસ કાફલો ઘટના સ્થળે દોડી આવ્યો હતો. પોલીસે ત્યાં લાગેલા સીસીટીવી ફૂટેજ તેમજ આ મામલે તપાસ કરી ગણતરીના કલાકોમાં જ આરોપીને ઝડપી પાડ્યો હતો. પોલીસે જણાવ્યું હતું કે આરોપીનું નામ હિતેશ ભરતભાઈ વસાણી છે અને તે ક્તારેશ્વ્ર મહાદેવ મંદિર પાસે રહે છે. યુટ્યુબ પર વિડીયો જોઇને તેણે આ લૂંટને અંજામ આપ્યો હતો. પોલીસે તેની પાસેથી ૨.૩૭ લાખની કિંમતની ૩ ચેઈન અને લૂંટના ગુનામાં વપરાયેલું બાઈક કબજે કરી આ મામલે વધુ તપાસ હાથ ધરી છે. વધુમાં આરોપીને દેવું થઇ જતા આ લૂંટ કરી હોવાનું જાણવા મળ્યું હતું.
વિડિઓ જર્નલિસ્ટ કે સી વઘાસિયા સત્યા ટીવી સુરત
