મહારાષ્ટ્રના જાલનામાં આજે સાંજે રિક્ષા અને ટ્રકની અથડામણથી થયેલા ભીષણ અકસ્માતમાં પાંચ જણ મોતના મુખમાં ધકેલાઇ ગયા હતા. આ દુર્ઘટનામાં બે જણને ઇજા થઇ હતી. આ બનાવ બાદ ઇજાગ્રસ્ત અને મૃતદેહો રિક્ષામાં દબાઇ ગયા હતા. સ્થાનિક લોકોની મદદથી તેમને બહાર કાઢવામાં આવ્યા હતા.
આ બનાવની માહિતી મુજબ બુલઢાણામાં ત્ર્યંબકનગરમાં રહેતો કૈફ શહા (ઉં.વ.૧૯) તેના મિત્ર બબન તિરુખે (ઉં.વ.૨૬) સાથે રિક્ષામાં માળંવજી ખાતે બહેનને લાવવા ગયો હતો. આજે બપોરે બહેન પરવીન બી રાજુ શહા (ઉં.વ.૨૫) તથા સાત વર્ષીય આલિયા રાજુ શહા, ત્રણ વર્ષીય મુસ્કાન સાથે દેઉળગામ રાજા તરફ જઇ રહ્યા હતા.
દરમિયાન જાલનામાં જાફરાબાદ તરફથી આવતા ટ્રક ચાલકે બેદરકારીપૂર્વક વાહન ચલાવીને રિક્ષાને અડફેટમાં લીધી હતી. રિક્ષા પલટી ખાઇ ગઇ હતી. રિક્ષાના કચ્ચરઘાણ નીકળી ગયો હતો. રિક્ષામાં પ્રવાસ કરતા એક જ પરિવારના ચાર જણ કૈફ શહા, પરવીન, આલિયા, મુસ્કાન તથા તિરુખેનું જગ્યા પર મોત થયું હતું. આ ઉપરાંત બાળુ ખરાત (ઉં.વ.૨૩) અને નવ વર્ષીય સાનિયા ગંભીરપણે જખમી થયા હતા. પોલીસે મામલાની નોંધ લઇ વધુ તપાસ આદરી હતી
