પાકિસ્તાનના સ્થાનિક અધિકારીઓના જણાવ્યા અનુસાર, ખૈબર પખ્તુનખ્વાના કુર્રમ જિલ્લામાં જમીનના ટુકડાને લઈને બે આદિવાસી જૂથો વચ્ચે આ સશસ્ત્ર સંઘર્ષ શરૂ થયો છે. હિંસામાં 36 લોકો માર્યા ગયા અને 162 ઘાયલ થયા. અધિકારીઓએ જણાવ્યું હતું કે ગામમાં અગાઉ આદિવાસીઓ અને ધાર્મિક જૂથો વચ્ચે ઘાતક અથડામણો તેમજ સાંપ્રદાયિક અથડામણો અને આતંકવાદી હુમલાઓ જોવા મળ્યા છે.
સમગ્ર હિંસા અંગે પોલીસે જણાવ્યું હતું કે અફઘાનિસ્તાનની સરહદે આવેલા ખૈબર પખ્તુનખ્વાના કુર્રમ જિલ્લામાં છેલ્લા પાંચ દિવસથી ચાલી રહેલી આદિવાસી હિંસામાં 36 લોકો માર્યા ગયા છે અને 162 અન્ય ઘાયલ થયા છે. આ ઘટના અપર કુર્રમ જિલ્લાના બોશેરા ગામમાં બની હતી.
અધિકારીઓએ જણાવ્યું છે કે આદિવાસી વડીલો, સૈન્ય નેતૃત્વ, પોલીસ અને જિલ્લા પ્રશાસનની મદદથી થોડા સમય પહેલા બોશેરા, મલિકેલ અને દુંદર વિસ્તારમાં શિયા અને સુન્ની જાતિઓ વચ્ચે સમજૂતી થઈ છે. જો કે જિલ્લાના અન્ય કેટલાક ભાગોમાં હજુ પણ ગોળીબાર ચાલુ છે. તે જ સમયે, એક અધિકારીએ કહ્યું કે બાકીના વિસ્તારોમાં પણ યુદ્ધવિરામ માટે પ્રયાસો કરવામાં આવી રહ્યા છે.
