ગાઝામાં ઇઝરાયલ દ્વારા સતત બોમ્બમારો અને હવાઈ હુમલામાં 100 થી વધુ પેલેસ્ટિનિયન નાગરિકો માર્યા ગયા છે. એક અહેવાલ અનુસાર, પૂર્વી ગાઝામાં વિસ્થાપિત લોકો રહેતી એક શાળાને નિશાન બનાવીને કરવામાં આવેલા ઇઝરાયલી હુમલામાં 100 થી વધુ લોકો માર્યા ગયા છે અને ડઝનો ઘાયલ થયા છે. આ હુમલો ત્યારે થયો જ્યારે લોકો નમાજ અદા કરી કરી રહ્યા હતા. કાર્યાલયે એક નિવેદનમાં જણાવ્યું કે, “ઇઝરાયલી હુમલાઓએ વિસ્થાપિત લોકોને નિશાન બનાવ્યા જ્યારે તેઓ ફજરની નમાઝ અદા કરી રહ્યા હતા, જેના કારણે જાનહાનિની સંખ્યામાં તીવ્ર વધારો થયો.”
ગાઝામાં 10 મહિનાથી ચાલી રહેલા યુદ્ધમાં 40,000 થી વધુ પેલેસ્ટિનિયન માર્યા ગયા છે. યુદ્ધગ્રસ્ત તટીય પેલેસ્ટિનિયન વિસ્તારમાં યુદ્ધવિરામ માટે વાટાઘાટોના અનેક રાઉન્ડ યોજાયા છે, પરંતુ હજુ સુધી કોઈ સફળતા મળી નથી.
