બેંગલુરુમાં મહાલક્ષ્મી નામની મહિલાની હત્યા કરી તેના મૃતદેહના ટુકડાને ફ્રિજમાં રાખવાના ચોંકાવનારા કેસથી આખો વિસ્તાર સ્તબ્ધ છે. આ કેસનો મુખ્ય શંકાસ્પદ મુક્તિરંજન રોયે ઓડિશામાં આત્મહત્યા કરી લીધી. પોલીસને મુક્તિરંજન રોયના મૃતદેહ પાસેથી તેમની સુસાઈડ નોટ મળી, જેનાથી આ હત્યાની ગૂંચ ઉકેલાતી જણાય છે. પોલીસ અનુસાર આરોપીની સુસાઈડ નોટમાં એ વાતની કબૂલાત છે કે તેણે જ મહાલક્ષ્મીની હત્યા કરી હતી. પોલીસે એ પણ જણાવ્યું કે હત્યા કર્યા પછી આરોપીએ સૌથી પહેલા કોને ફોન કર્યો.
આરોપીએ નાના ભાઈને ફોન કરીને શું કહ્યું?
મુક્તિરંજન રોયની સુસાઈડ નોટનો ઉલ્લેખ કરતાં બેંગલુરુ પોલીસના એક વરિષ્ઠ અધિકારીએ જણાવ્યું કે મહિલાની હત્યા કર્યા પછી આરોપીએ પોતાના નાના ભાઈને ફોન કર્યો અને તેને તરત જ ભાડાનું ઘર ખાલી કરવા માટે કહ્યું. જ્યારે મુક્તિરંજનના નાના ભાઈએ તેને પૂછ્યું કે આખરે તે ઘર ખાલી કરવા માટે કેમ કહી રહ્યો છે તો આરોપીએ કહ્યું કે તે તેની સાથે ફોન પર વાત નથી કરી શકતો અને ઘરે મળીને તેને બધું જણાવશે.