સુપ્રીમ કોર્ટના પૂર્વ ન્યાયાધીશ રોહિનટન નરીમને બાબરી ધ્વંસ પછી આરોપીઓ સામે ચલાવવામાં આવેલી ટ્રાયલ પર સવાલો ઉઠાવ્યા છે. સાથે જ કહ્યું હતું કે બાબરી મસ્જિદની નીચે કોઇ રામ મંદિર નહોતુ મળ્યું, તે બાબત ખુદ સુપ્રીમ કોર્ટે સ્વીકારી હતી. તેમણે કહ્યું હતું કે સુપ્રીમ કોર્ટની દખલ બાદ પણ આ ટ્રાયલ બહુ જ લાંબી ચાલી હતી અને ભાજપના વરિષ્ઠ નેતાઓને છોડી મુકવામાં આવ્યા હતા. આ નેતાઓને આરોપોથી મુક્ત કરનારા સીબીઆઇ કોર્ટના સ્પેશિયલ જજ સુરેન્દ્ર યાદવને બાદમાં ઉત્તર પ્રદેશમાં લોકાયુક્ત બનાવી દેવાયા હતા. તેઓ નિવૃત્ત થયા તે બાદ આ પદ અપાયું હતું. એટલુ જ નહીં પૂર્વ ન્યાયાધીશે કહ્યું હતું કે ખુદ સુપ્રીમ કોર્ટે સ્વીકાર કર્યો છે કે બાબરી મસ્જિદની નીચે કોઇ રામ મંદિર નહોતું.
બાબરી મસ્જિદ 1528માં બનાવાઇ, 1853માં વિવાદ પહેલા ત્યાં કોઇ જ વિવાદ નહોતો. બે હિસ્સા હતા જેમાં એક હિસ્સામાં હિન્દુ અને બીજા હિસ્સામાં મુસ્લિમ પ્રાર્થના નમાઝ કરતા હતા અને આવુ 1857થી 1949 સુધી ચાલ્યું હતું.1949 માં 50થી 60 લોકો મસ્જિદમાં ઘૂસ્યા અને ત્યાં એક મૂર્તિ રાખી દેવાઇ. 2003નો એએસઆઇનો રિપોર્ટ કહે છે કે આ સ્થળ જુદા જુદા ધર્મના લોકો સાથે જોડાયેલુ રહ્યું છે જેમાં શૈવ સંપ્રદાય, બુદ્ધિષ્ટ, જૈનનો સમાવેશ થાય છે. દેશના સૌથી વરીષ્ઠ ન્યાયવીદોમાં સ્થાન ધરાવતા ફલી સામ નરીમનના પુત્ર અને સુપ્રીમ કોર્ટના પૂર્વ ન્યાયાધીશ રોહિનટન નરીમનના આ ખુલાસા બાદ અનેક સવાલો ઉઠી રહ્યા છે.
