ટીમ ઈન્ડિયામો એક અનોખો રેકોર્ડ પણ છે. ટીમ ઈન્ડિયા જ્યારે પણ પાકિસ્તાન સામે T20 વર્લ્ડલ કપમાં ટૉસ જીતી છે, ત્યારે તે મેચ ભારતીય ટીમ ક્યારેય હારી નથી. ત્યારે આ રેકોર્ડને જોતા, આજે પણ ભારતીય ટીમ સારું પરફોર્મંસ આપીને આ ખરાખરીના જંગમાં જીત મેળવશે.
T20 વર્લ્ડ કપ 2022ના સૌથી મોટો મુકાબલો માટે મંચ તૈયાર કરવામાં આવ્યો છે. આજે, ભારત અને પાકિસ્તાનની ટીમ બપોરે 1.30 વાગ્યે મેલબોર્ન ક્રિકેટ ગ્રાઉન્ડ પર ઉતરશે, ત્યારબાદ લગભગ 1 લાખ દર્શકો સ્ટેડિયમમાં તેનો આનંદ માણશે અને લગભગ 300 મિલિયન લોકો ટીવી અને ડિજિટલ પ્લેટફોર્મ પર તેનો આનંદ માણશે. હવામાન મોરચે પણ રાહતના સમાચાર છે. ગઈકાલ સુધી મેચ દરમિયાન વરસાદની સંભાવના 90% હતી. હવે તેની સંભાવના ઘટીને 15% થઈ ગઈ છે.
આજ સવારના હવામાન અપડેટ મુજબ, મેલબોર્નમાં વાતાવરણ વાદળછાયું હતું, પરંતુ હવે તે વાદળો વિખેરાઈ ગયા છે. વરસાદની સંભાવના પણ હવે ઓછી થઈ ગઈ છે.
ઓસ્ટ્રેલિયાના MCG સ્ટેડિયમમાં 37 વર્ષ પછી ભારત અને પાકિસ્તાનની ટીમ વચ્ચે મેચ રમાશે. આ મેદાને છેલ્લીવાર બન્ને ટીમ 1985માં બેન્સન એન્ડ હેજિસ વર્લ્ડ ચેમ્પિયનશિપમાં ટકરાઈ હતી.
મેલબોર્નની પિચ કેવી છે?
મેલબોર્ન ક્રિકેટ ગ્રાઉન્ડની છેલ્લી 5 મેચની વાત કરીએ તો આ ગ્રાઉન્ડ પર ચેઝ કરનાર ટીમે જીત મેળવી છે. આ પાંચેય મુકાબલામાં હાઈએસ્ટ સ્કોર 175 રનનો રહ્યો હતો, જે ઓસ્ટ્રેલિયાએ શ્રીલંકાની સામે બનાવ્યો હતો.
પહેલી ઇનિંગમાં એવરેજ સ્કોર 145 રન છે. તો બીજી ઇનિંગમાં એવરેજ સ્કોર 140 રન છે. ભારતે આ મેદાનમાં એક જ ઇનિંગમાં સૌથી વધુ 184 રન બનાવ્યા હતા. પાકિસ્તાનનો આ મેદાનમાં એવરેજ સ્કોર 125 રન છે. આ પિચમાં ફાસ્ટ બોલરોને મદદ મળતી હોય છે. આ પિચ પર પેસર્સે 59 વિકેટ ઝડપી છે.
T20 ફોર્મેટમાં બન્ને ટીમ વચ્ચે ઓવરઓલ 11 મેચ રમાઈ છે. જેમાં 7 મેચમાં ટીમ ઈન્ડિયાને જીત મળી છે, તો 3 મેચમાં પાકિસ્તાનને જીત મળી છે. 1 મેચ ટાઈ રહી છે, જેમાં ટીમ ઈન્ડિયાએ બોલ આઉટમાં જીત મેળવી હતી.
ભારતીય ટીમનો ઓસ્ટ્રેલિયામાં T20 ઈન્ટરનેશનલ ક્રિકેટમાં શાનદાર રેકોર્ડ છે. ટીમ ઈન્ડિયાએ ત્યાં 12 મેચ રમી છે. આમાં 7 જીતી છે અને 4 હારી છે. એક મેચ અનિર્ણિત છે. ભારતે આ તમામ 12 મેચ માત્ર ઓસ્ટ્રેલિયા સામે જ રમી છે.
ભારત અને પાકિસ્તાન વચ્ચે T20 વર્લ્ડ કપની હાઈવોલ્ટેજ મેચ ભારતીય સમય પ્રમાણે બપોરે 1.30 વાગ્યાથી રમાશે. ટોસ અડધો કલાક વહેલો એટલે કે બપોરે 1:00 વાગ્યે થશે. તો મેચનું લાઈવ સ્ટ્રીમિંગ Disney + Hotstar પર જોઈ થશે. આ સાથે તમે લાઇવ અપડેટ્સ દિવ્ય ભાસ્કરને અપ પર જોઈ શકો છો.
શાહિન શાહ આફ્રિદી ટીમ ઈન્ડિયા માટે સૌથી મોટો ખતરો રહેશે. 2021ના T20 વર્લ્ડ કપમાં શાહિને 31 રન આપીને 3 વિકેટ ઝડપી હતી. રોહિત, વિરાટ અને કેએલ રાહુલ દુબઈમાં મળેલી હારનો બદલો લેવા આજે મેદાને ઉતરશે. તો એશિયા કપ માટે પાકિસ્તાન ના રમવા જવા અંગે BCCIના નિવેદન પછી પાકિસ્તાનના પેટમાં તેલ રેડાયું હતું, અને તેઓએ આવતા વર્ષે ભારતમાં યોજાનારા વન-ડે વર્લ્ડ કપને બૉયકૉટ કરવાની ધમકી આપી હતી. ત્યારે આજની મેચમાં સૌ કોઈની નજર રહેશે.