ભરૂચના બરાનપુરા રેલવેના પાટા પાસે શહેરના બરાનપુરા ખત્રીવાડ ખાતે રહેતાં કુખ્યાત બુટલેગર જીતેન્દ્ર ઉર્ફે જીતુ ખત્રીએ વિદેશીદારૂ મંગવ્યો હોવાનું તેમજ તે દારૂ તેનો સાગરિત રેલવે સ્ટેશન તરફથી લાવવાનો હોવાની બાતમીના આધારે ભરૂચ એ ડિવિઝન પોલીસે વોચ ગોઠવી હતી. દરમિયાનમાં એક મોપેડ પર જીતુ ખત્રી તેમજ તેનો સાગરિત જનક શ્યામસિંગ ઠાકોર ત્યાં આવતાં પોલીસે તેમને ઝડપી પાડ્યાં હતાં.
તેમની પાસેથી બેગ તપાસતાં તેમા વિદેશીદારૂની કુલ 22 હજારની મત્તાની નાની-મોટી 102 બોટલો મળી આવી હતી. દારૂ ક્યાંથી લાવ્યો તે અંગેની પ્રાથમિક પુછપરછમાં તેણે કબુલ્યું હતું કે, થોડીવાર પહેલાં બરાનપુરાનો જ મહેન્દ્ર વસાવા મુંબઇથી ટ્રેનમાં દારૂ લાવ્યો હોઇ તે અને તેની સાથેનો મનોજ બચુ વસાવા તેેને આપી ગયો હોવાનું કબુલ્યું હતું.
