સાઉથના સુપરસ્ટાર રજનીકાંતને લઈને ચાહકોનો ક્રેઝ જગજાહેર છે. લગભગ 2 વર્ષ પછી પડદા પર ‘થલાઈવા’ની વાપસીને લઈને ચાહકો ખૂબ જ ઉત્સાહિત છે. આજે રજનીકાંત અને તમન્ના ભાટિયાની ફિલ્મ ‘જેલર’ સિનેમાઘરોમાં રિલીઝ થઈ છે. જેલરની શાનદાર એડવાન્સ બુકિંગને જોતા એવું માનવામાં આવે છે કે આ ફિલ્મ બોક્સ ઓફિસ પર રેકોર્ડ બ્રેક કમાણી કરી શકે છે. એડવાન્સ બુકિંગથી જ ફિલ્મે 35 કરોડથી વધુની કમાણી કરી છે.
રજનીકાંતની ફિલ્મો ચાહકો માટે કોઈ તહેવારથી ઓછી નથી. રજનીકાંત અને તમન્ના ભાટિયાની ‘જેલર’ને સાઉથથી લઈને વિદેશમાં સારો પ્રતિસાદ મળી રહ્યો છે. આવી સ્થિતિમાં, એવી અપેક્ષા રાખવામાં આવે છે કે જેલર બોક્સ ઓફિસ પર શાનદાર ઓપનિંગ મેળવી શકે છે. ઘણા અહેવાલોમાં એવું કહેવામાં આવી રહ્યું છે કે જેલર ફક્ત તમિલનાડુમાં જ પ્રથમ દિવસે 20 કરોડની ઓપનિંગ કરી શકે છે.
બીજી તરફ પહેલા દિવસના ગ્લોબલ કલેક્શનની વાત કરીએ તો રજનીકાંતની જેલર દુનિયાભરમાં 70થી 80 કરોડની કમાણી કરી શકે છે. ફિલ્મે એડવાન્સ બુકિંગથી ભારતમાં લગભગ 20 કરોડની કમાણી કરી છે, જ્યારે વૈશ્વિક કલેક્શન એડવાન્સ બુકિંગથી 35 કરોડથી વધુ છે.
જેલરની સાથે રજનીકાંત 2 વર્ષ બાદ મોટા પડદા પર પરત ફરી રહ્યા છે. ફિલ્મમાં 72 વર્ષીય રજનીકાંત 33 વર્ષની તમન્ના ભાટિયા સાથે જોવા મળે છે. આ સિવાય જેલરમાં જેકી શ્રોફ, રામ્યા ક્રિષ્નન, યોગી બાબુ અને વિનાયક જેવા તેજસ્વી કલાકારોનો સમાવેશ થાય છે. મલયાલમ સુપરસ્ટાર મોહનલાલ અને કન્નડ સ્ટાર શિવ રાજકુમાર ફિલ્મમાં કેમિયો છે.
રજનીકાંતના જેલરનો સાઉથમાં જબરદસ્ત ક્રેઝ છે, જોકે સવાલ એ ઊભો થાય છે કે કમાણીના મામલે જેલર શાહરુખ ખાનના પઠાણને પાછળ છોડી શકશે કે કેમ? પઠાણ આ વર્ષે ભારતની સૌથી વધુ કમાણી કરનારી ફિલ્મ છે. શાહરૂખ ખાનની પઠાણે શરૂઆતના દિવસે જ વિશ્વભરમાં 106 કરોડની બમ્પર કમાણી કરી હતી. પઠાણે ભારતમાં જ 53 કરોડની કમાણી કરી હતી.
