બોલિવૂડમાં છોટે નવાબના નામથી પ્રખ્યાત અભિનેતા સૈફ અલી ખાન આજે પોતાનો 55મો જન્મદિવસ ઉજવી રહ્યો છે. નવાબ અને ફિલ્મી બેકગ્રાઉન્ડમાંથી આવતા સૈફે પોતાનું એક અલગ સ્થાન હાંસલ કર્યું છે. સૈફે દરેક શૈલીની એટલે કે રોમેન્ટિક, એક્શન અને કોમેડી ફિલ્મો કરી છે. સૈફ અલી ખાનનો જન્મ 16 ઓગસ્ટના રોજ દિલ્હીમાં થયો હતો.
તે અભિનેત્રી શર્મિલા ટાગોર અને ભારતીય ક્રિકેટ ટીમના ભૂતપૂર્વ કેપ્ટન મન્સૂર અલી ખાન પટૌડીનો પુત્ર છે. સૈફ અલી ખાન પોતાની પ્રોફેશનલ લાઈફ અને પર્સનલ લાઈફને લઈને ઘણી ચર્ચામાં રહે છે. આવી સ્થિતિમાં આજે તેમના જન્મદિવસના અવસર પર આપણે જાણીએ નવાબ પરિવારના સૈફ અલી ખાન વિશે કેટલીક રસપ્રદ વાતો.
સૈફ અલી ખાનના દાદા હરિયાણાના પટૌડી રજવાડાના નવાબ હતા, જેના કારણે તેમને પટૌડી રજવાડાના છોટા નવાબ કહેવામાં આવે છે. સૈફ અલી ખાન ભારતીય ક્રિકેટ ટીમના ભૂતપૂર્વ કેપ્ટન મન્સૂર અલી ખાન ઉર્ફે ટાઈગર પટૌડીનો પુત્ર છે જ્યારે તેની માતા શર્મિલા ટાગોર હિન્દી સિનેમાની દિગ્ગજ અભિનેત્રી રહી છે. સૈફ અલી ખાનને બે બહેનો છે, સોહા અલી ખાન જે બોલીવુડની અભિનેત્રી છે અને સબા અલી ખાન જે જ્વેલરી ડિઝાઇનર છે.
સૈફે તેનું શાળાકીય શિક્ષણ લોરેન્સ સ્કૂલ, સનવર, હિમાચલ પ્રદેશમાં પૂર્ણ કર્યું, અને ત્યારબાદ લોકર્સ પાર્ક સ્કૂલ અને વિન્ચેસ્ટર કોલેજમાં ઉચ્ચ અભ્યાસ પૂર્ણ કર્યો, જે બંને યુકેમાં છે. અભ્યાસ પૂરો કરીને સૈફ જ્યારે યુકેથી પાછો ફર્યો ત્યારે તેણે દિલ્હીમાં એક એડવર્ટાઈઝિંગ ફર્મમાં થોડા મહિનાઓ સુધી કામ કર્યું. જ્યારે એક પારિવારિક મિત્રએ તેના પર દબાણ કર્યું, ત્યારે તેણે ગ્વાલિયરમાં ટીવી કોમર્શિયલ શૉટમાં અભિનેતા તરીકે કામ કર્યું.
સૈફ ફિલ્મ બેખુદીના શૂટિંગ દરમિયાન અભિનેત્રી અમૃતા સિંહને મળ્યો ત્યારે સૈફની માતા શર્મિલા ટાગોરને અમૃતા અને સૈફના સંબંધો બિલકુલ પસંદ નહોતા કારણ કે અમૃતા સૈફ કરતા ઘણી મોટી હતી. પરંતુ તેની માતાની વિરુદ્ધ જઈને અમૃતા સાથે લગ્ન કર્યા. સૈફે 1991માં અમૃતા સિંહ સાથે લગ્ન કર્યા, આ લગ્નથી તેમને બે બાળકો છે, સારા અલી ખાન અને ઈબ્રાહિમ અલી ખાન. બંનેના વર્ષ 2004માં છૂટાછેડા થઈ ગયા હતા.
સૈફ અલી ખાન અને કરીના કપૂરની પહેલી મુલાકાત 2008માં ડિરેક્ટર વિજય કૃષ્ણ આચાર્યની ફિલ્મ ટશનના શૂટિંગ દરમિયાન થઈ હતી. બોક્સ ઓફિસ પર આ ફિલ્મ કંઈ ખાસ કમાલ ના કરી શકી, પરંતુ કરીના અને સૈફની જોડી ચોક્કસ બની ગઈ. સૈફ અલી ખાને લાંબા સમય સુધી લિવ-ઈનમાં રહ્યા બાદ કરીના કપૂર સાથે લગ્ન કરવાનો નિર્ણય લીધો હતો. સૈફ અલી ખાન અને કરીના કપૂરે સાદા કોર્ટ મેરેજ કર્યા હતા અને પછી મીડિયાને તેમના લગ્ન વિશે જણાવ્યું હતું.
