રશિયાના રાષ્ટ્રપતિ વ્લાદિમીર પુતિન પહેલા જ સ્પષ્ટ કરી ચુક્યા છે કે તેઓ G20 સમિટમાં ભાગ નહીં લઈ શકે.હવે ચીનના રાષ્ટ્રપતિ શી જિનપિંગ પણ સમિટમાં ભાગ નહીં લે. તેમના સ્થાને ચીનના વડાપ્રધાન ભારત આવે તેવી શક્યતા છે. ચીન તરફથી હજુ સુધી કોઈ સત્તાવાર નિવેદન આવ્યું નથી, પરંતુ ચર્ચા છે કે, શી જિનપિંગ પોતે ભારત આવવા માંગતા નથી. તેઓ તેમના સ્થાને પ્રીમિયર લી કિઆંગને સમિટમાં મોકલવાનો પ્રયાસ કરી રહ્યા છે.
G20 સમિટ માટે દિલ્હીમાં તૈયારીઓ પૂરજોશમાં ચાલી રહી છે. ઘણા દેશોના નેતાઓએ સ્પષ્ટ કર્યું છે કે તેઓ ભારત આવી રહ્યા છે. રાષ્ટ્રપતિ વ્લાદિમીર પુતિને 8-10 સપ્ટેમ્બરના રોજ યોજાનારી સમિટ માટે પહેલાથી જ સ્પષ્ટ કરી દીધું છે કે તેઓ G20 માટે ભારત નહીં આવી શકે. હવે એવા સમાચાર છે કે શી જિનપિંગ પણ G20 સમિટમાં ભાગ નહીં લે. ચીનના રાષ્ટ્રપતિ છેલ્લે 2019 માં ભારતની મુલાકાતે આવ્યા હતા, જ્યાં વડા પ્રધાન નરેન્દ્ર મોદીએ મલપ્પુરમમાં તેમનું સ્વાગત કર્યું હતું.
વડાપ્રધાન નરેન્દ્ર મોદી અને રાષ્ટ્રપતિ શી જિનપિંગે તાજેતરમાં દક્ષિણ આફ્રિકામાં અનૌપચારિક વાતચીત કરી હતી. બંને નેતાઓએ સરહદ મુદ્દે ચર્ચા કરી હતી. પીએમ મોદીએ જિનપિંગને સ્પષ્ટ કર્યું હતું કે સરહદ પર શાંતિ જાળવી રાખવી જોઈએ. શી જિનપિંગ પીએમ મોદી સાથે વાત કરતા જોવા મળ્યા હતા. બંને નેતાઓ વચ્ચે સત્તાવાર વાતચીતની અપેક્ષા હતી. આ માટે ચીને પણ સંપર્ક કર્યો હતો પરંતુ ભારત રાજી નહોતું. જો કે, શી જિનપિંગ ભારત આવવાથી શા માટે સંકોચ કરી રહ્યા છે તે હજુ સ્પષ્ટ નથી.
