દિવાળીના તહેવારને હવે ગણતરીના દિવસો બાકી છે. દિવાળીના અવસર પર લોકો ઘીની વાનગીઓ અને મીઠાઈઓ બનાવે છે. આ દિવસોમાં ઘીનું વેચાણ વધે છે. સાથે જ બ્રાન્ડેડ કંપનીઓના પેકિંગ સાથે બજારમાં આડેધડ રીતે ‘નકલી ઘી’ વેચાઈ રહ્યું છે. આ સીરીઝમાં ફેમસ ડેરી બ્રાન્ડ ‘અમૂલ’ના નામે નકલી ઘી પણ વેચાઈ રહ્યું છે.અમૂલે ગ્રાહકોને નકલી અમૂલ ઘી વિશે ચેતવણી આપી છે.
કંપનીને જાણવા મળ્યું છે કે કેટલાક અપ્રમાણિક એજન્ટ બજારમાં નકલી ઘી વેચી રહ્યા છે. આ ઘી એક લિટર રિફિલ પેકમાં વેચવામાં આવે છે, જે અમૂલે છેલ્લા 3 વર્ષથી બનાવ્યું નથી.ડુપ્લિકેશન પ્રૂફ કાર્ટન પેકનો ઉપયોગ-અમૂલે તેની એડવાઈઝરીમાં કહ્યું છે કે તેણે નકલી ઉત્પાદનોથી બચવા માટે ડુપ્લિકેશન પ્રૂફ કાર્ટન પેકનો ઉપયોગ કરવાનું શરૂ કર્યું છે. આ નવું પેકેજિંગ અમૂલની ISO-પ્રમાણિત ડેરીઓમાં અદ્યતન એસેપ્ટિક ફિલિંગ ટેક્નોલોજીનો ઉપયોગ કરીને બનાવવામાં આવે છે. આ ટેકનોલોજી ઉત્તમ ગુણવત્તાના ધોરણોને સુનિશ્ચિત કરે છે.
કંપનીએ ગ્રાહકોને સાવચેત રહેવા અને ખરીદતા પહેલા પેકેજિંગ તપાસવા વિનંતી કરી છે જેથી તેઓ અસલી પ્રોડક્ટ ખરીદે. આ ઉપરાંત ગ્રાહકોને કોઈપણ પ્રશ્ન કે ચિંતા માટે અમૂલના ટોલ ફ્રી નંબર 1800 258 3333 પર સંપર્ક કરવા કહેવામાં આવ્યું છે.
