ઝઘડિયા નગરમાં ભંડારી ચાલમાં આજરોજ સવારે એક મકાનમાં અચાનક આગ લાગતા આસપાસના રહીશોમાં ભાગદોડ મચી જવા પામી હતી.મકાનમાં આગે દેખા દીધા બાદ જોતજોતામાં આગે મોટું સ્વરૂપ ધારણ કરી લેતા અગ્નિશામક દળોને બોલાવાયા હતા. આગમાં ઘરવખરીનો સામાન સળગી જતા મકાન માલિકને મોટું આર્થિક નુકશાન વેઠવાનો વારો આવ્યો હતો.ભંડારી ચાલમાં રહેતા વર્ષા પટેલ સવારે નોકરીએ ગયા હતા, ત્યારે તે દરમિયાન કોઈ અગમ્ય કારણોસર મકાનમાં આગ લાગતા ઘરમાં રહેલ તમામ ચીજ વસ્તુઓ આગમાં સ્વાહા થઇ ગઇ હતી. આગ લાગતા ફાયર વિભાગને જાણ કરાતા ઝઘડિયા જીઆઇડીસીના અગ્નિશામક દળોએ આવીને આગ પર પાણીનો મારો ચલાવીને આગ પર કાબુ મેળવ્યો હતો. આગની ઘટના બની તે સમયે સદભાગ્યે ઘરમાં કોઇ હાજર ન હોઇ જાનહાની ટળી હતી.
December 4, 2024
