બોરસદ તાલુકાના નાપા તળપદ ગામમાં રહેતો મકસૂદ દિલુભા રાણા અવારનવાર આણંદ ખાતે ઘાસચારો વેચવા માટે આવતો હતો. એ દરમિયાન ઘાસચારો લેવા આવતી 30 વર્ષની અપરિણીત યુવતીના સંપર્કમાં આવ્યો હતો. પોતાનું નામ મકસૂદ દિલુભા રાણા હોવા છતાં તેણે પોતાનું નામ મુકેશ હોવાનું જણાવીને યુવતી સાથે પરિચય કેળવીને બાદમાં તેને પ્રેમજાળમાં ફસાવી હતી. ત્યાર બાદ અવારનવાર આણંદ ખાતે ગેસ્ટહાઉસમાં લઈ જઈને તેની સાથે શારીરિક સંબંધો બાંધ્યા હતાં. જાન્યુઆરી 2020થી જાન્યુઆરી 2025 દરમિયાન મકસૂદ રાણાએ યુવતી સાથે અવારનવાર શરીર સંબંધો બાંધીને તેના ફોટા પાડી લીધા હતા.
યુવતીએ લગ્ન કરવાની વાત કરતાં જ દિલુભા રાણાએ ફોટા વાઈરલ કરવાની તેમજ જાનથી મારી નાખવાની ધમકીઓ આપી હતી. બીજી બાજુ યુવતીએ તપાસ કરતાં તે જેની સાથે પ્રેમસંબંધ રાખતી હતી તે મુકેશ નહીં, પરતુ મકસૂદ રાણા હોવાનું અને તે પરિણીત હોવાનું જાણવા મળ્યું હતું. જેથી યુવતીએ આ અંગે આણંદ શહેર પોલીસ મથકમાં ફરિયાદ નોંધાવી છે. એના આધારે પોલીસે આરોપી મકસૂદ રાણાની ધરપકડ કરી આગળની કાર્યવાહી હાથ ઘરી છે.
