વિરાટ કોહલીની એક ઝલક જોવા માટે ચાહકો અરુણ જેટલી સ્ટેડિયમમાં ઉમટી પડ્યા છે. દિલ્હી અને રેલવે વચ્ચે રણજી ટ્રોફી 2024-25 મેચ અરુણ જેટલી સ્ટેડિયમમાં રમાઈ રહી છે. આ મેચમાં વિરાટ કોહલી દિલ્હી ટીમનો હિસ્સો છે. આ મેચ આજથી શરૂ થઈ ગઈ છે. ત્યારે આ મેચ દરમિયાન કોહલીની સુરક્ષામાં મોટી ચૂક થઈ છે. મેચમાં વિરાટ કોહલીને જોવા માટે ચાહકો સ્ટેન્ડમાં હાજર હતા, ત્યારે એક ચાહક સુરક્ષા ઘેરો તોડીને મેચ દરમિયાન મેદાનમાં ઘૂસી આવ્યો હતો. વીડિયોમાં જોઈ શકાય છે કે, એક ફેન સ્ટેન્ડમાંથી બહારથી આવે છે અને કોહલી તરફ દોડી જાય છે. આ સમય દરમિયાન કોહલી સ્લિપમાં ફિલ્ડિંગ કરી રહ્યો છે. ચાહક ત્યાં પહોંચીને તરત જ કોહલીના પગ સ્પર્શ કરે છે.
ત્યારબાદ તરત જ સુરક્ષા ગાર્ડ મેદાનમાં દોડી આવે છે અને ચાહકને પકડીને સ્ટેડિયમની બહાર લઈ જાય છે. આ સમય દરમિયાન મેચ થોડા સમય માટે અટકી જાય છે. પછી મેચ ફરી શરૂ થાય છે. તમને જણાવી દઈએ કે મેચમાં દિલ્હીએ ટોસ જીતીને બોલિંગ કરવાનો નિર્ણય લીધો છે.નોંધનીય છે કે, વિરાટ કોહલીની 13 વર્ષ બાદ રણજી ટ્રોફીમાં વાપસી થઈ છે. આ પહેલા કોહલીએ ટુર્નામેન્ટની છેલ્લી મેચ નવેમ્બર 2012માં રમી હતી. હવે ચાહકો રેલવે સામેની મેચમાં કોહલીની બેટિંગ જોવા માટે ખૂબ જ ઉત્સાહિત દેખાઈ રહ્યા છે.
