હાંસોટ બસ ડેપો નજીક એસ.ટી.બસ અને ટેન્કર વચ્ચે અકસ્માત સર્જાયો
એસ.ટી બસમાં સવાર તમામ મુસાફરોનો આબાદ બચાવ થયો
ડેપોમાંથી બસ બહાર આવી રહી હતી એ દરમ્યાન સર્જાયો અકસ્માત
અકસ્માતમાં કોઈ જાનહાની નહિ
હાંસોટના બસના ડેપો નજીક એસ. ટી. બસ અને ટેન્કર વચ્ચે અકસ્માત સર્જાતા અફરાતફરીનો માહોલ સર્જાયો હતો. સદનસીબે ઘટનામાં કોઈ જાનહાની નહીં સર્જાતા લોકોએ હાશકરો અનુભવ્યો હતો.
ભરૂચ જિલ્લામાં દિવસ દરમિયાન અકસ્માતની ઘટનાઓ સામે આવતી હોય છે, જિલ્લાના વિવિધ તાલુકામાં અકસ્માતના બનાવો વધતા હોય તેમ લાગી રહ્યું છે, તેવામાં આજે સવારે અકસ્માતની વધુ એક ઘટના સામે આવી હતી, જેમાં સદનસીબે કોઈ જાનહાની ન થતા સ્થાનિકોએ રાહતનો શ્વાસ અનુભવ્યો હતો.
ભરૂચ જિલ્લાના હાંસોટ ખાતે આવેલ એસ.ટી ડેપોમાંથી બહાર નીકળી રહેલ એસ.ટી બસ અને ટેન્કર વચ્ચે અકસ્માત સર્જાતા એક સમયે ભારે દોડધામ મચી હતી, અકસ્માતની ઘટનામાં એસ.ટી બસના કાચ તૂટી ગયા હતા જોકે સદનસીબે બસમાં સવાર તમામ મુસાફરોને કોઈપણ પ્રકારની ઇજાઓ ન પહોંચતા સ્થાનિકોએ રાહતનો શ્વાસ લીધો હતો.
એસ.ટી બસ અને ટેન્કર ચાલકે સ્ટેરિંગ પરનો કાબૂ ગુમાવતા આ ઘટના સર્જાઈ હોવાનું માનવામાં આવી રહ્યું છે, જોકે ઘટના અંગે હાંસોટ પોલીસે અકસ્માત અંગેનો ગુનો દાખલ કરી કાયદેસરની કાર્યવાહી હાથધરી હતી.
વિડીયો જર્નલિસ્ટ પુરુભાઈ મિસ્ત્રી સાથે સત્યા ટીવી અંકલેશ્વર
