વેરાવળના લાટી ગામે હિટ એન્ડ રનની ઘટનામાં અકસ્માતમાં પોલીસકર્મીનું ઘટનાસ્થળે મોત થયું છે. વિગતો મુજબ હેડ ક્વાર્ટરમાં ફરજ બજાવતા ASI એ.કે.રાઠોડ બાઇક લઈને સુત્રાપાડા તરફ જઈ રહ્યા હતા. આ દરમિયાન અજાણ્યા કાર ચાલકે તેમણે અડફેટે લેતા ગંભીર ઇજાઓને કારણે તેમનું ઘટનાસ્થળે જ કરૂણ મોત થયું હતું. અકસ્માત સર્જ્યા બાદ કારચાલક સ્થળ પરથી ફરાર થઈ ગયો હતો. જોકે હવે પોલીસે અજાણ્યા કાર ચાલકની શોધખોળ હાથ ધરી છે.
અમરેલી-સાવરકુંડલા રોડ કાર અને બાઇક વચ્ચે અકસ્માતની ઘટના સામે આવી છે. પ્રાથમિક માહિતી મુજબ બોરાળા ગામેથી કેરાળા ગામે જતા પરીવારને અકસ્માત નડ્યો હતો. જેમાં 2 બાળકી અને 1 મહિલા સહિત બાઈકચાલકને ઇજાઓ પહોંચી હતી. જોકે ગંભીર રીતે ઇજાગ્રસ્ત બાળકીનું મોત થયું છે. આ તરફ ઈજાગ્રસ્તોને સારવાર માટે હોસ્પિટલ ખસેડાયા હતા.
મહીસાગરના લુણાવાડાના હડોડ ગામ પાસે અકસ્માતની ઘટના સામે આવી છે. વિગતો મુજબ બાઇક પર જઈ રહેલ દંપતિને અજાણ્યા વાહને ટક્કર મારી હતી. આ અકસ્માતમાં 40 વર્ષીય મહિલાનું ઘટનાસ્થળે જ મૃત્યુ થયું છે. આ તરફ પતિને ગંભીર ઈજાઓ થતા હોસ્પિટલ ખસેડાવામાં આવ્યા હતા.
