શુક્રવારે રાત્રે ઉલ્હાસનગર વિસ્તારમાં હિલ લાઇન પોલીસ સ્ટેશનમાં વરિષ્ઠ નિરીક્ષકની ચેમ્બરની અંદર ભાજપના કલ્યાણ ધારાસભ્ય ગણપત ગાયકવાડે કલ્યાણ શિવસેના પ્રમુખ મહેશ ગાયકવાડ પર ગોળીબાર કર્યો હતો. તેમની ધરપકડ પહેલા ગણપત ગાયકવાડે એક ન્યૂઝ ચેનલને જણાવ્યું હતું કે તેમના પુત્રને પોલીસ સ્ટેશનમાં મારવામાં આવી રહ્યો હતો તેથી તેણે ગોળીબાર કર્યો. તેમણે આરોપ લગાવ્યો કે મુખ્યમંત્રી એકનાથ શિંદે મહારાષ્ટ્રમાં ‘ગુનેગારોનું સામ્રાજ્ય’ સ્થાપિત કરવાનો પ્રયાસ કરી રહ્યા છે. મહેશ ગાયકવાડને પહેલા સ્થાનિક મીરા હોસ્પિટલમાં લઈ જવામાં આવ્યા હતા પરંતુ તેમની તબિયત બગડતા તેમને થાણેની જ્યુપિટર હોસ્પિટલમાં લઈ જવામાં આવ્યા હતા. શિવસેનાના કલ્યાણ એકમના પ્રભારી ગોપાલ લાંડગેએ કહ્યું, ‘તેમનું ઓપરેશન સફળ રહ્યું હતું.’
ગણપત ગાયકવાડનો પુત્ર જમીન વિવાદની ફરિયાદ નોંધાવવા પોલીસ સ્ટેશન આવ્યો હતો, ત્યારે મહેશ ગાયકવાડ તેના લોકો સાથે ત્યાં પહોંચ્યા હતા. બાદમાં ગણપત ગાયકવાડ પણ પોલીસ સ્ટેશન પહોંચ્યો હતો. અધિકારીના જણાવ્યા મુજબ ધારાસભ્ય અને શિવસેનાના નેતા વચ્ચેની બોલાચાલી દરમિયાન ગણપત ગાયકવાડે વરિષ્ઠ નિરીક્ષકની ચેમ્બરની અંદર મહેશ ગાયકવાડ પર કથિત રીતે ગોળીબાર કર્યો હતો, જેમાં તે અને તેના સાથીદારને ઈજા થઈ હતી.
ગણપત ગાયકવાડે એક ન્યૂઝ ચેનલ સાથે વાત કરતા કહ્યું, ‘હા, મેં તેને મારી જાતે ગોળી મારી છે. મને કોઈ અફસોસ નથી. મારા પુત્રને પોલીસ સ્ટેશનની અંદર પોલીસની સામે માર મારવામાં આવે તો હું શું કરીશ? તેણે દાવો કર્યો કે તેણે પાંચ રાઉન્ડ ફાયરિંગ કર્યું. ભાજપના ધારાસભ્યએ આરોપ લગાવ્યો કે મુખ્યમંત્રી એકનાથ શિંદે ‘મહારાષ્ટ્રમાં ગુનેગારોનું સામ્રાજ્ય બનાવવાનો પ્રયાસ કરી રહ્યા છે’. ભાજપ અને શિંદેની આગેવાની હેઠળની શિવસેના મહારાષ્ટ્રમાં સત્તાધારી ગઠબંધનનો ભાગ છે.
આ ઘટનાના સંદર્ભમાં ગાયકવાડ સહિત ત્રણ લોકોની ધરપકડ કરવામાં આવી છે. ડીસીપી સુધાકર પઠારે કહે છે, ‘છ લોકો સામે કેસ નોંધવામાં આવ્યો છે, જેમાંથી ત્રણની ધરપકડ કરવામાં આવી છે. અન્ય ત્રણની શોધખોળ ચાલુ છે. એફઆઈઆરમાં આઈપીસી અને આર્મ્સ એક્ટની કલમો લગાવવામાં આવી છે.
