સંયુક્ત રાષ્ટ્ર મહાસભાની બેઠકથી હટીને ન્યૂયોર્કમાં ઓઆઈસીના સભ્ય દેશોની બેઠક થઈ. પાકિસ્તાને બતાવેલા રસ્તા પર ચાલીને OICએ કાશ્મીર પર કથિત રીતે એક સંપર્ક સમૂહની રચના કરી છે. આ સંપર્ક સમૂહે કાશ્મીરી લોકોના કાયદેસરના સંઘર્ષને સમર્થન આપવાનો પણ દાવો કર્યો છે. આ સિવાય કાશ્મીરી લોકોના અધિકારોને લઈને પણ નિવેદનો આપ્યા છે.સંયુક્ત નિવેદનમાં કહેવામાં આવ્યું છે કે, જમ્મુ અને કાશ્મીરમાં સંસદીય ચૂંટણીઓ અથવા વિધાનસભાની ચૂંટણીઓ કાશ્મીરી લોકોને આત્મનિર્ણયનો અધિકાર આપવાના વિકલ્પ તરીકે કામ કરી શકે નહીં. નિવેદનમાં વધુમાં કહેવામાં આવ્યું છે કે દક્ષિણ એશિયામાં સ્થાયી શાંતિ અને સ્થિરતા સંયુક્ત રાષ્ટ્ર સુરક્ષા પરિષદના ઠરાવો અને કાશ્મીરી લોકોની આકાંક્ષાઓ અનુસાર કાશ્મીર વિવાદના અંતિમ ઉકેલ પર નિર્ભર છે.
OIC એ ઇસ્લામિક દેશોનો સમૂહ છે. આ સંગઠનમાં કુલ 57 દેશો સામેલ છે. OIC ની સ્થાપના 1969 માં મોરોક્કોના રાબાતમાં થઈ હતી. તેનું હેડક્વાર્ટર સાઉદી અરેબિયાના જેદ્દાહ શહેરમાં આવેલું છે. OIC ની સત્તાવાર ભાષાઓ અરબી, અંગ્રેજી અને ફ્રેન્ચ છે. એ અલગ વાત છે કે મુસ્લિમોની સંખ્યાની દૃષ્ટિએ વિશ્વનો ત્રીજો સૌથી મોટો દેશ ભારત તેનો સભ્ય નથી. ભારતે દર વખતે કાશ્મીર મુદ્દે OICના નિવેદનોને ફગાવી દીધા છે અને તેને અરીસો બતાવ્યો છે.
