રાજ્યમાં મેઘરાજા ધમધોકાર બેટિંગ કરી રહ્યાં છે. તેમજ મધ્યપ્રદેશ સહિતના રાજ્યમાં પણ ધોધમાર વરસાદ વરસ્યો છે, ત્યારે નર્મદા નદી ગાંડીતૂર બની છે. જેના કારણે ભરૂચ, રાજપીપળાના અનેક વિસ્તારોમાં પ્રભાવિત થયા છે અને પૂર જેવી પરિસ્થિતિનું નિર્માણ થયું છે. કાંઠા વિસ્તારના ઘરોમાં પાણીમાં ગરકાવ થયા છે. તો બીજી તરફ ભારે વરસાદના પગલે કેટલીક ટ્રેનો રદ્દ કરવાની પણ ફરજ પડી છે.
તારીખ 18 સપ્ટેમ્બરના રોજ ટ્રેન નંબર 20960 વડનગર-વલસાડ એક્સપ્રેસ, ટ્રેન નંબર 19036 અમદાવાદ-વડોદરા ઇન્ટરસિટી એક્સપ્રેસ અને ટ્રેન નંબર 19035 વડોદરા-અમદાવાદ ઇન્ટરસિટી એક્સપ્રેસ ટ્રેન રદ કરવામાં આવી છે.
ભરૂચ અને અંકલેશ્વર વચ્ચે 502 નંબરના પુલ પર પાણી ખતરાને લઈ રેલ વ્યવહાર પ્રભાવિત થયો છે. જેમાં કેટલીક ટ્રેનો રદ કરવામાં આવી છે, જ્યારે કેટલીક ટ્રેનો રિસિડ્યુલ કરવામાં આવી છે. તેમજ ધીમેથી અને સાવધાનીથી ચલાવવામાં આવી રહી છે
વરસાદના કારણે અનેક ટ્રેનો રદ કરાઇ છે. મુંબઇ-ભરૂચના મુસાફરો અમદાવાદમાં અટવાયા છે. અત્રે જણાવીએ કે, ગઇકાલ રાતની ટ્રેન હજુ ન આવતાં મુસાફરોને હાલાકી ભોગવવાનો વારો આવ્યો છે. પ્રસંગ માટે આવેલો 30 લોકોનો પરિવાર પણ અમદાવાદમાં ફસાયો છે. જે યાત્રિઓ દ્વારા વૈકલ્પિક વ્યવસ્થા કરવાની માગ પણ કરવામાં આવી રહી છે.
