ભારતીય હવામાન વિભાગ (IMD) એ 12 નવેમ્બરે 12 જિલ્લામાં ભારે વરસાદ માટે યલો એલર્ટ જાહેર કર્યું હતું. એલર્ટ 13 નવેમ્બર માટે 17 જિલ્લાઓ અને 15 નવેમ્બર માટે 25 જિલ્લાઓમાં લંબાવવામાં આવ્યું હતું. એજન્સીએ બુધવારે તેના બુલેટિનમાં જણાવ્યું હતું કે, 13 થી 16 નવેમ્બર સુધી તમિલનાડુ અને પુડુચેરીમાં અલગ-અલગ સ્થળોએ ભારે વરસાદની સંભાવના છે.
મંગળવારે રાત્રે ચેન્નાઈમાં ભારે વરસાદ પડ્યો હતો. તમિલનાડુની રાજધાની ચેન્નાઈના અદ્યાર, મીનામ્બક્કમ અને નંદનમ જેવા ઘણા વિસ્તારોમાં 6 સેમી વરસાદ નોંધાયો હતો. ચેન્નાઈમાં શાળાઓ અને કોલેજો બુધવાર (13 નવેમ્બર) અને ગુરુવાર (14 નવેમ્બર)ના રોજ ખુલ્લી રહેશે. ભારે વરસાદને જોતા વહીવટીતંત્રે સોમવાર અને મંગળવારે શાળા-કોલેજો બંધ રાખવાનો આદેશ આપ્યો હતો. જોકે ભારે વરસાદને ધ્યાનમાં રાખીને રાજ્ય સરકારે બુધવારે પેરમ્બલુર, અરિયાલુર અને કુડ્ડલોર જિલ્લાની શાળાઓમાં રજા જાહેર કરી હતી. આ સિવાય માયલાદુથુરાઈ જિલ્લામાં ભારે વરસાદને કારણે શાળા-કોલેજો બંધ કરી દેવામાં આવી છે.
